Sjá fleiri gagnasöfn
Fyrirspurn
Veftré
English
SkandinaviskSöfn Orðabókar Háskólans |
| Söfn Orðabókar Háskólans, sem nú eru í vörslu Stofnunar Árna Magnússonar í íslenskum fræðum, geyma margvíslegar heimildir um íslenskan orðaforða frá því um miðja 16. öld fram til okkar daga. Stærstu söfnin eru ritmálssafnið sem geymir dæmi um notkun orða í rituðu máli frá því um 1540 og síðar og talmálssafnið þar sem eru geymdar umsagnir heimildarmanna um orð og orðanotkun í mæltu máli. Þau eru bæði seðlasöfn að stofni til en hafa nú verið tölvuskráð að talsverðu leyti þótt einungis ritmálssafnið sé öllum aðgengilegt í gagnasafni. Auk þessara tveggja meginsafna varðveitir stofnunin smærri sérsöfn frá ýmsum tímum. Þau eru mikilvægar heimildir, bæði um orðaforðann og um þróun íslenskrar orðabókagerðar. Þar má nefna nokkur seðlasöfn sem unnin eru upp úr gömlum óútgefnum orðasöfnum. Hið stærsta geymir seðla úr orðabókarhandriti Jóns Ólafssonar úr Grunnavík, en einnig hefur verið skrifað upp úr 48 orðabókarhandritum frá 17., 18. og 19. öld. Orðasöfn úr fórum einstaklinga eru nokkur og þau markverðustu eru vasabækur Björns M. Ólsens, seðlasafn Þórbergs Þórðarsonar og safn séra Jóhannesar L. L. Jóhannssonar. Þá geymir Orðabókin handrit Íslensk-danskrar orðabókar Sigfúsar Blöndals. Loks má nefna safn rafrænna texta, hið svonefnda textasafn. Þar eru varðveittir heilir textar og textabrot úr verkum af ýmsu tagi, einkum frá síðustu áratugum en einnig nokkuð af eldri textum. Í safninu má leita að dæmum um orð og orðmyndir og það er að hluta opið almenningi. |