Fyrsta vetrardag var hleypt af stokkunum erindaröðinni Góssið hans Árna um handrit úr safni Árna Magnússonar. Erindin verða á dagskrá í hádeginu annan hvern miðvikudag í vetur. 25. janúar fjallar Árni Heimir Ingólfsson um kvæða- og tvísöngsbók frá Vestfjörðum og 8. febrúar flytur Ásdís Egilsdóttir erindi um handrit handa konum.

Málbreytingar og tilbrigði í íslensku máli á 19. öld, Prentsmiðja fólksins, Kvæðabók sr. Ólafs Jónssonar á Söndum og Vald og ofbeldi á Íslandi á miðöldum eru heiti á nýjum verkefnum sem unnin verða á stofnuninni með styrk úr Rannsóknasjóði.

Stofnunin býður nýjum áskrifendum að Griplu árgjaldið á 3.200 krónur sem er um 30% afsláttur af verði ritsins í lausasölu. Tilboðið gildir til 1. febrúar 2012. Nýjasta heftið, Gripla 22, er aðgengilegt á vef stofnunarinnar sem pdf-skjal á meðan áskriftartilboðið varir.

Rómverja saga, Handbók um íslensku, Úr fórum orðabókarmanns, Hulin pláss, Tækileg vitni, Fjöruskeljar, Sagan upp á hvern mann og alþjóðlegu tímaritin Gripla og Orð og tunga komu út á vegum stofnunarinnar árið 2011.

Aðgangur að íslensk-skandinavísku veforðabókinni ISLEX er ókeypis á vefnum. Veforðabókin tengir íslenskan orðaforða og málnotkun á nútímalegan hátt við önnur norræn mál og styrkir norrænan málskilning að margvíslegu leyti.

Stundum verða atvik til þess að nöfn manna tengjast einhverjum atburði og festast í orðasamböndum eða sem heiti á einhverju. Oft er erfitt að rekja hvaða persóna er að baki og fyrirspurnir bæta litlu sem engu við. Hér verða nefnd tvö slík nöfn, Ingjaldur og Þorlákur.