EDDUKVÆÐI I–II, Íslenzk fornrit 17.10.2014

Eddukvæði I-II, Íslenzk fornrit Smellið á myndina til að stækka hana. Hið íslenzka fornritafélag kynnir nýja og vandaða útgáfu eddukvæða í tveimur bindum með skýringum og formála. Kvæðin eru 36 að tölu, og texti þeirra er birtur orði til orðs eins og hann er í handritum, en stafsetning samræmd með þeim hætti sem tíðkast í útgáfum félagsins. Hverri vísu fylgja rækilegar skýringar, og í yfirgripsmiklum formála er gerð grein fyrir efni kvæðanna og einkennum. Útgefendurnir, Jónas Kristjánsson og Vésteinn Ólason, voru samanlagt í röska þrjá áratugi forstöðumenn Árnastofnunar. Verkið nýtur reynslu þeirra af rannsóknum og útgáfum fornra texta.

Eddukvæði er að finna í Konungsbók eddukvæða frá 13. öld og fáeinum öðrum íslenskum miðaldahandritum. Eddukvæðin hafa lengi verið talin meðal gersema heimsbókmenntanna. Í þeim birtast skáldlegar sýnir, stórbrotin tilfinningaátök, djúp speki og hárbeitt skop í hnitmiðuðu en þó frjálslegu formi. Kvæðin eiga sér eldfornar rætur í trúarbrögðum norrænna þjóða og sögnum og kvæðum af hetjum allt frá öld þjóðflutninga. Varðveitta mynd hafa þau fengið á víkingaöld eða síðar.

Í fyrra bindi eru goðakvæði. Frægast þeirra er Völuspá um sköpun heimsins og tortímingu í ragnarökum. Hávamál eru lögð Óðni í munn og flytja einkum speki um líf í mannheimi. Önnur goðakvæði segja frá ævintýrum og átökum í goðheimum og eru oft gamansöm þótt ógn ragnaraka vofi yfir.

Í síðara bindi eru hetjukvæði sem segja sögur af fornfrægum hetjum eins og Sigurði Fáfnisbana, Guðrúnu Gjúkadóttur, frændliði þeirra og mágum. Hetjurnar eru glæstar og bera af öðrum, bæði konur og karlar, en heitar ástríður og ósveigjanleg sæmdarvitund steypa þeim í glötun.

Jónas Kristjánsson og Vésteinn Ólason gáfu út með inngangi og skýringum.
Ritstjóri: Þórður Ingi Guðjónsson.
ISBN 978-9979-893-99-8 469 bls. / 466 bls.
Verð: 12.490 kr.

Hið íslenska bókmenntafélag Skeifunni 3b 108 Reykjavík
www.hib.is Pantanir í netfang: hib@islandia.is
Pantanir í síma: 588-9060

Bóksala stúdenta Sæmundargötu 4 101 Reykjavík
www.boksala.is Pantanir í netfang: boksala@boksala.is
Pantanir í síma: 570-0777

 

 

Sett inn 08.10.2014
Til baka