Breytileiki Njáls sögu

Markmið verkefnisins er að rannsaka breytileika Njáls sögu með aðferðum málvísinda, bókmenntafræði, handrita- og textafræði þar sem bæði er beitt samtímalegri greiningu, í tilfelli elstu handritanna sem eru frá 14. öld, og sögulegri greiningu sem felst í því að kanna hvaða breytingar verða á texta og handritum í tímans rás. Rannsókninni er einkum beint að þeim þáttum í varðveislusögu Njálu sem hafa hlotið fremur litla athygli, svo sem elstu brotum sögunnar, handritinu Gráskinnu og pappírshandritum frá síðari öldum, og hún tekur mið af nýjum kenningum sem leggja áherslu á breytileika texta í handritum. Með þessu er leitast við að sýna hvernig hin lifandi hefð Njálu var á hverjum tíma, hvað einkenndi texta verksins og gerð Njáluhandrita á ólíkum tímapunktum frá 14. til 19. aldar og hvernig breytilegur texti og útlit haldast í hendur við þarfir og viðhorf skrifara, verkbeiðenda og notenda. Verkefnið mun mynda grunn að rafrænni gagnaveitu um Njáls sögu og nýrri útgáfu sögunnar.

Verkefnisstjóri er Svanhildur Óskarsdóttir en aðrir þátttakendur eru Haraldur Bernharðsson, Ludger Zeevaert, Emily Lethbridge, Margrét Eggertsdóttir og Sveinn Yngvi Egilsson (Háskóla Íslands) auk doktorsnemans Susanne M. Fahn (University of Wisconsin) og Beeke Steegman MA-nema (Háskóla Íslands). Verkefnið er unnið í samstarfi við Den arnamagnæanske samling í Kaupmannahöfn.

Nánari upplýsingar á ensku á vefnum: www.arnastofnun.is/page/breytileiki_njalu

(Verkefnið er styrkt af RANNÍS)