Myndarlegur styrkur úr sjóði Áslaugar Hafliðadóttur til að þróa nýtt textagreiningartæki tengt Íslensku orðaneti
Jón Hilmar Jónsson og Bjarki Karlsson
Jón Hilmar Jónsson, höfundur Íslensks orðanets, og Bjarki Karlsson, samverkamaður hans, að opnun og kynningu afstaðinni.

 

Þegar úthlutað var úr Styrktarsjóði Áslaugar Hafliðadóttur í liðinni viku fengu Jón Hilmar Jónsson og Bjarki Karlsson styrk til frekari þróunar á Íslensku orðaneti sem hjálpartæki við textagerð.

 

 

 

Jón Hilmar segir að hugmyndin hafi kviknað þegar vinna við Orðanetið stóð yfir á síðasta ári:  „Þá varð okkur Bjarka ljóst að textahöfundum kemur vel að geta skimað eftir valkostum í orðalagi um leið og þeir semja textann, metið það sem bent er á og eftir atvikum breytt á skjótvirkan hátt. Gagnvart Orðanetinu liggur beinast við að virkja orðasamböndin í þessu sambandi. Í framhaldinu má svo gera stökum orðum sambærileg skil.  Við sóttum því um styrk til að þróa greiningartæki í þessu skyni sem við höfum valið heitið Ritskyggnir. Vinnan við verkefnið hefst í haust og við vonum að árangurinn komi í ljós á næsta ári."

 

Ritskyggnir – fleiryrtar orðabókareiningar í textasamhengi miðar að því að búa málnotendum í hendur verkfæri til að ná fram skýrari og blæbrigðaríkari málnotkun við textaritun. Ritskyggnir hefur það hlutverk að greina orðanotkun í samfelldum texta og benda á valkosti í orðalagi, sérstaklega þegar um er að ræða merkingarbær orðasambönd. Ef textahöfundur vill breyta orðalagi getur hann virkjað viðkomandi valkost á einfaldan hátt. Gögn úr Íslensku orðaneti eru lögð til grundvallar en viðbótargögn eru sótt í stafræn textasöfn, einkum Tímarit.is, með hálfsjálfvirkum innlestri sem síðan er yfirfarinn og samræmdur. Markmiðið er jafnframt að gera merkingarbær orðasambönd almennt greinanleg í textasamhengi og greiða með því fyrir athugunum á stöðu þeirra og einkennum. Því er verkefninu einnig ætlað að nýtast við margs konar greiningu á íslenskum mál- og orðabókargögnum.

 

 

Sett inn 06.04.2017
Til baka
Deila þessari frétt: Senda frétt Facebook