Marjorie Curry Woods flytur Árna Magnússonar fyrirlestur

Í ár mun Marjorie Curry Woods flytja fyrirlestur Árna Magnússonar í Norræna húsinu, 13. nóvember kl. 17.

Marjorie Curry Woods er prófessor í ensku og almennri bókmenntafræði — Blumberg Professor of English, Professor of Comparative Literature, and University Distinguished Teaching Professor — við Texas-háskóla í Austin og hefur kennt þar frá árinu 2011.

Marjorie Curry Woods flytur Árna Magnússonar fyrirlestur 2017.

Hún lauk B.A.-prófi í ensku frá Stanford-háskóla og M.A.- og doktorsprófi í miðaldafræðum frá Toronto-háskóla. Í fyrstu beindust rannsóknir hennar að skýringum við mikilvægt miðaldarit um mælskufræði, Poetria nova eftir Geoffrey frá Vinsauf, og hefur hún birt tvær bækur um efnið: An Early Commentary on the Poetria nova of Geoffrey of Vinsauf sem er útgáfa og þýðing á tveimur gerðum skýringanna og Classroom Commentaries: Teaching the Poetria nova Across Medieval and Renaissance Europe (sem hlaut árið 2010 bókaverðlaun Rhetoric Society of America).

Í seinni tíð hefur hún skoðað athugasemdir og skýringar við miðaldahandrit sem ætluð voru til kennslu á klassískum textum og eru niðurstöður væntanlegar í bókinni Weeping for Dido: Teaching the Classics in the Middle Ages, byggðri á Gombrich-fyrirlestrum sem hún flutti við Warburg Institute í Lundúnum árið 2014.

Marjorie Curry Woods hefur einkum áhuga á því hvernig kennarar á miðöldum lögðu áherslu á texta þar sem tilfinningar eru tjáðar, sérstaklega ræður sem lagðar eru kvenpersónum í munn. Næsta verkefni hennar verður að skoða hvernig nota megi söguleg rit sem voru æfingar í að semja texta við kennslu bókmennta frá fyrri öldum. 

Hér eru nokkrar linur þar sem Marjorie Curry Woods segir frá tilurð fyrirlestrarins:

„Þegar ég hitti deildarstjóra handritasafns Princeton-háskóla og spurði hann hvort safnið geymdi einhver miðaldahandrit með bókmenntum fornaldar, svaraði hann: „Bara ljót.“ „Frábært,“ svaraði ég, „ég vinn einmitt með þannig handrit“. Í fyrirlestrinum mun ég skýra hvað við áttum við með „ljótum handritum“ og ræða hvað af þeim má læra. Þetta eru ekki fagurlega lýst skrauthandrit rituð á besta bókfell fyrir höfðingja eða preláta, heldur brúkshandrit rituð á afgangsskinn eða pappír, framleidd fyrir skólanema og háskólastúdenta, þ.e. þá sem lögðust yfir textana en ekki þau sem flettu þeim sér til skemmtunar. Fyrirlesturinn byggist á nýlegum rannsóknum mínum á handritum nokkurra klassískra texta (Eneasarkviðu Virgils, Achilleid eftir Statius og Ilias latina) en einnig eldri rannsóknum mínum á handritum Poetria nova eftir Geoffrey af Vinsauf, vinsælum miðaldatexta. Ég mun einkum beina sjónum að því sem er ritað á milli línanna (og á spássíurnar) og var ætlað að vekja með stúdentum kenndir til þess sem gerist í textanum, ekki síður en að hjálpa þeim að tileinka sér hann.“

 

Hér má sjá lista yfir þá sem flutt hafa Árna Magnússonar fyrirlestur frá upphafi.

Sett inn 26.10.2017
Til baka
Deila þessari frétt: Senda frétt Facebook