Samningur um sýningu undirritaður í Listasafni Íslands

Guðrún Nordal greinir frá hlut Árnastofnunar í sýningu sem opnar um miðjan júlí 2018 í tilefni 100 ára afmælis fullveldis Íslands. Um mitt næsta ár verður opnuð stór sýning í Listasafni Íslands þar sem sýnd verða listaverk, handverk og heimildir sem tengjast fullveldi Íslands.

Það var ekki tilviljun sem réði því að 1. desember 2017 var samningur á milli Stofnunar Árna Magnússonar í íslenskum fræðum og nefndar Alþingis um hátíðarhöld í tilefni 100 ára fullveldisafmælis um sýninguna undirritaður að viðstöddum samstarfsaðilum og fjölmiðlafólki í Listasafni Íslands.

Ragnheiður Jóna Ingimarsdóttir framkvæmdastjóri hátíðahaldanna og Guðrún Nordal forstöðumaður Árnastofnunar skrifuðu undir samninginn með fjöðurstaf, heimalöguðu jurtableki og á örk af kálfsskinni til að vísa í forna arfinn. Yfir þeim hékk svo listaverk Birgis Andréssonar, íslenskir fánar prjónaðir í sauðalitunum. Umgjörð samningsins vísar því bæði aftur í tímann og til vorra daga, en þannig mun sýningin endurspegla marga fleti íslenskrar menningar.

Sýningin mun opna um miðjan júlí 2018 í Listasafni Íslands og standa fram yfir 1. desember 2018. Hún mun hafa víða skírskotun og birta gögn sem áður hafa ekki sést opinberlega.

 

 

Sett inn 01.12.2017
Til baka
Deila þessari frétt: Senda frétt Facebook