Bjartsýni og framkvæmdahugur á ársfundi 2018

Ársfundur Stofnunar Árna Magnússonar í íslenskum fræðum var haldinn árla mánudaginn 14. maí 2018. Dagskráin var þéttskipuð og flutti bæði fólk innan og utan stofnunar stutt erindi. 

Þorsteinn Pálsson, formaður stjórnar stofnunarinnar, setti fundinn með kraftmiklu ávarpi þar sem 100 ára gamalt símskeyti og skopsagan um húsbyggingu eina á Melunum komu við sögu. Hér má lesa ávarp Þorsteins í heild.

Sigríður Ásdís Snævarr og Áslaug Dóra Eyjólfsdóttir sóttu ársfund stofnunarinnar og gengu út með græðling úr holu Húss íslenskunnar. Mynd: Jóhanna Ólafsdóttir

Mennta- og menningarmálaráðherra ávarpaði einnig fundinn og lagði áherslu á mikilvægi íslenskukennslu fyrir börn og unglinga af erlendum uppruna en Úlfar Bragason sagði einmitt frá því á fundinum að stefnt væri að því að útbúa sérstaka gerð Icelandic Online kennsluforritinu fyrir börn og unglinga. Erindin fjölluðu um landvinninga íslenskunnar í útlöndum, bráðnauðsynlega viðgerð Flateyjarbókar, ný þróunarverkefni innan stofnunarinnar og endurreisn gagnagrunna um íslensku sem byggja á gömlum vélbúnaði og þurfa að ganga í endurnýjun til að verða að gagni. 
Í lok fundar minnti forstöðumaður á líkindi á milli garðræktar og málræktar og í þeim bjartsýna anda voru gestir og fyrirlesarar sendir út í daginn með sjálfssáð tré úr grunni Húss íslenskunnar. 


Vefútgáfa ársskýrslu fyrir árið 2017 verður birt á vefsíðunni innan skamms.

Sett inn 14.05.2018
Til baka
Deila þessari frétt: Senda frétt Facebook