Innlent samstarf

Stofnunin á náið samstarf við Háskóla Íslands og  samstarfssamningur er í gildi milli skólans og stofnunarinnar. Nokkrir starfsmenn kenna við skólann og leiðbeina meistara- og doktorsnemum. Kennarar og nemendur HÍ nýta sér bókasafn stofnunarinnar og  rannsóknaaðstöðu og margir doktorsnemar hafa þar fasta aðstöðu. Stofnunin á fulltrúa í stjórn Miðaldastofu og dósent í miðaldafræði hefur starfsaðstöðu á stofnuninni.

Um kennslu íslensku sem annars máls er einnig samstarf við HÍ og stofnunin á fulltrúa í stjórn Rannsóknastofu í máltileinkun. Verkefnið Icelandic Online hefur verið unnið í samstarfi við HÍ og nokkra íslenska lektora.

Samstarf er við HÍ um rekstur sumarnámskeiða í íslensku máli og menningu fyrir erlenda nemendur.  Einnig hefur verið samstarf við Þjóðræknisfélags Íslendinga um íslenskukennslu fyrir vestur-íslensk ungmenni sem taka þátt í Snorraverkefni félagsins.

Einnig má nefna samstarf við Stofnun Vigdísar Finnbogadóttur og ýmis háskólasetur, s.s. Rannsóknasetur HÍ á Hornafirði og Rannsóknarsetur HÍ á Skagaströnd.  Starfsmenn stofnunarinnar leggja til efni á Vísindavefinn.

Náið samstarf er við Háskólann í Reykjavík á sviði máltækni og stofnunin á fulltrúa í stjórn Máltækniseturs. Gerður hefur verið samstarfssamningur við Hið íslenzka fornritafélag sem felst m.a. í því að stofnunin verður meðútgefandi að nýrri ritröð félagsins og að ritstjóri Íslenzkra fornrita hefur þar starfsaðstöðu.

Á sviði örnefnamála er gott samstarf við fjölmarga einstaklinga og stofnanir. Örnefnaskrár einstakra jarða eða svæða eru lagfærðar, endursamdar eða upplýsingum bætt við. Ný örnefni eru skráð og skýrð, eldri sömuleiðis. Þetta samstarf skilur eftir þekkingu á sviðinu sem nýtist víða, ekki síst í kortagerðarmálum. Stofnunin á náið samstarf við Landmælingar Íslands en hún hefur lögbundið eftirlitshlutverk við skráningu örnefna á landakort. Örnefnaskrár eru skráðar í Sarp og á stofnunin þar fulltrúa í stjórn.

Íðorðanefndir á fjölmörgum fræðasviðum eiga samstarf við stofnunina og leggja til efni í  Orðabankann. Orðanefndirnar funda reglulega á málræktarsviði og hafa þar aðstöðu eftir samkomulagi.

Stofnunin hefur margvíslegt samstarf við Landsbókasafn Íslands – Háskólabókasafn. Handrit.is  er samstarfsverkefni stofnunarinnar, Landsbókasafns Íslands – Háskólabókasafns og Nordisk forskningsinstitut í Kaupmannahöfn. Bókasafn stofnunarinnar er skráð í Gegni og tengist Landskerfi bókasafna. Stofnunin á fulltrúa í stjórn Miðstöðvar munnlegrar sögu á Landsbókasafninu.

Einnig ber að nefna náið samstarf stofnunarinnar við Þjóðminjasafn Íslands, Listasafn Íslands, Þjóðskjalasafn Íslands og héraðsskjalasöfn um varðveislu og safnastarfsemi almennt.

Tónlistarsafn Íslands og þjóðfræðisvið stofnunarinnar hafa sameiginlega umsjón með Ísmús, vef um íslenskan músík- og menningararf.

Stofnunin hefur gert  formlega samstarfssamninga við stofnanir og fræðasetur á landsbyggðinni og á fulltrúa í stjórn Breiðdalsseturs, Snorrastofu Reykholti, Þórbergsseturs  og Gunnarsstofnunar á Skriðuklaustri.

Einnig hefur verið fjölbreytt samstarf við Reykjavíkurakademíuna, Fornleifavernd ríkisins, Listvinafélag Hallgrímskirkju, Lærdómssetur á Leirubakka, Þjóðlagasetur sr. Bjarna Þorsteinssonar á Siglufirði og Þjóðmenningarhúsið.

Starfsmenn stofnunarinnar eru auk þess í fræðilegu samstarfi við fjölmarga aðila innanlands og er nánari upplýsingar um það að finna undir köflunum Rannsóknir og Miðlun.

Stofnunin hefur haft samstarf um útgáfu bóka og geisladiska m.a. við Hið íslenska bókmenntafélag, JPV, Leif Eiríksson, Námsgagnastofnun og Smekkleysu.