Pappírsslóð rakin. Efniviður íslenskra bóka og handrita frá 16. og 17. öld − frá pappírsframleiðslu til bókasafna

Rannsóknarverkefnið „Pappírsslóð rakin. Efniviður íslenskra bóka og handrita frá 16. og 17. öld − frá pappírsframleiðslu til bókasafna.“

Verkefnið fellur bæði undir bóksögu og það svið handritafræði sem kallast efnisleg fílólógía (material philology), þar sem augum er ekki beint að textum handrita eða bóka sérstaklega heldur að gripunum sjálfum út frá ýmsum sjónarhornum. Rannsóknin felst í stórum dráttum í því að rannsaka umferð pappírs á 16. og 17. öld, pappírs í íslenskum handritum og bókum prentuðum á Íslandi, sem sumar enduðu í erlendum bókasöfnum. Greiningar og lýsingar á vatnsmerkjum (framleiðslumerki í pappír) og útbreiðsla pappírs og prentaðra bóka er undirstaða rannsóknarinnar. Hvernig barst pappír til landsins og hvaðan? Hvernig dreifðist hann innanlands? Var munur á því hvernig opinberir aðilar öfluðu sér pappírs og notuðu hann og því hvernig einkaaðilar fóru að? Af hvaða ástæðum söfnuðu erlendir fræðimenn íslenskum bókum? Hvernig komust þeir yfir bækurnar? Silvia Hufnagel, Regina Jucknies og Vasaré Rastonis vinna að rannsókninni undir stjórn Þórunnar Sigurðardóttur. Rannsóknin er unnin í samstarfi við handritadeild Landsbókasafns Íslands, Árnasafn í Kaupmannahöfn, Háskólabókasafnið í Köln og Tækniháskóla í Köln. Styrkurinn er til þriggja ára og á því tímabili er áætlað að birta greinar í fræðiritum, standa fyrir ráðstefnu og gefa út greinasafn um efnið. Silvia og Regina munu einnig gefa út rit um viðfangsefnið hvor um sig.