Leiðsögn og fræðsla fyrir skólahópa í Listasafni Íslands

Á handritahluta sýningarinnar Lífsblómið – fullveldi Íslands í 100 ár eru sex valin miðaldahandrit úr eigu Árna Magnússonar (1663–1730) handritasafnara og prófessors við Kaupmannahafnarháskóla, sem geyma fjölbreytta texta ritaða á íslensku en auk þeirra má sjá handrit frá Landsbókasafni íslands og Þjóðskjalasafni Íslands. Handrit í vörslu Stofnunar Árna Magnússonar í íslenskum fræðum bárust úr tveimur söfnum í Kaupmannahöfn, Árnasafni og Konunglega bókasafninu, og voru afhent íslensku þjóðinni til varðveislu á árunum 1971–1997; um 2000 handrit og handritabrot á skinni eða hörpappír.

Safnkennari Árnastofnunar tekur á móti skólahópum í safninu á meðan sýningin stendur yfir, þ.e. til 16. desember. Boðið er upp á kynningu og fræðslu fyrir nemendur mið- og efsta stigs grunnskóla auk menntaskóla. Í grunninn miðast kennslan við námskrá og er áhersla lögð á að tengja fræðsluna námsefni hverrar bekkjardeildar. Heimsókn fyrir nemendur á háskólastigi er sniðin að þörfum hvers og eins hóps.

Í máli og myndum eru nemendur fræddir um munnlega geymd sagna- og kvæðaarfsins, um ritun og gerð íslenskra miðaldahandrita og varðveislu þeirra fram á okkar daga. Fjallað er um bókmenntir, sögu og menningarlíf þjóðarinnar, bókagerðina sjálfa, þ.e. handverkið við gerð miðaldahandrita; verkun kálfskinns í bókfell, blekgerð og liti, myndlýsingar o.fl. auk skurðar á fjöðurstaf eins og hann tíðkaðist fyrr á öldum. Stækkaðar litljósmyndir sýna ólíkar leturgerðir og þróun skriftarinnar í miðalda- og síðari tíma handritum og sérstaka rittækni skrifaranna, þ.e. skammstafanir, styttingar og bönd sem þeir beittu óspart við ritstörf sín. Nemendur fá tækifæri til að spreyta sig við lestur fornra texta en með því sjá þeir hversu lítið íslensk tunga hefur í raun breyst í aldanna rás.

Undir lok heimsóknarinnar býðst nemendum að tylla sér niður og skrifa með tilskornum fjöðurstaf á kálfskinn, sem verkað er með ævafornri aðferð, og bleki löguðu af sortulyngsseyði, sortu, krækiberjum og grávíðileggjum.

Tekið er endurgjaldslaust á móti hópum í Listasafninu alla virka daga eftir samkomulagi. Húsrúm er fyrir einn bekk í einu, þ.e. um 25 eða samsvarandi fjölda nemenda og tekur heimsóknin um eina klukkustund. Nánari upplýsingar um leiðsögnina og bókanir veitir Svanhildur María Gunnarsdóttir safnkennari Stofnunar Árna Magnússonar í íslenskum fræðum: svanhildur.maria.gunnarsdottir@arnastofnun.is eða í síma 822 0121.