Oft er haft á orði að Íslendingar eigi sér litla sem enga hefð í myndlist. Myndskreytingar í íslenskum miðaldahandritum og myndirnar í íslenska miðaldahandritinu Teiknibókinni í Árnasafni taka af öll tvímæli um að slíkar fullyrðingar standast engan veginn.
Teiknibókin er einstæð meðal íslenskra handrita og eina handrit sinnar tegundar sem varðveist hefur á Norðurlöndum. Það geymir nánast eingöngu myndefni og var notað sem vinnubók og fyrirmyndasafn listamanna frá 14. öld og fram á 17. öld við gerð ýmiss konar listaverka af kristilegum toga. Meðal efnis í bókinni eru myndraðir um sköpunina, úr ævi Maríu og píslarsögu Krists. Þar eru einnig allmargar Maríu- og dýrlingamyndir og ýmis önnur minni sem hvergi eru varðveitt annars staðar í íslenskri miðaldalist. Handritið er skert en 22 blöð eru varðveitt og mörg hver afar illa farin.
Teiknibókin er ein af fáum teiknibókum frá miðöldum sem varðveist hafa í Evrópu og eins og fyrr segir sú eina á Norðurlöndum. Fyrirmyndir Teiknibókarinnar varpa einstæðu ljósi á íslenska trúarlist og hugarheim miðalda og óhætt að fullyrða að hvergi sé samankomið efni á einum stað sem veitir jafn ríkulega innsýn í trúar- og kirkjulist hins kaþólska siðar á Íslandi.
Íslenska teiknibókin hefur alþjóðlega skírskotun og menningargildi vegna þess hversu fágætar miðaldateiknibækur eru. Útgáfa hennar mun vekja áhuga utan Íslands og niðurstöður rannsóknar Guðbjargar Kristjánsdóttur listfræðings eru þýðingarmikið innlegg í alþjóðlega umræðu um fyrirmyndabækur á miðöldum.
Íslenska teiknibókin hlaut íslensku bókmenntaverðlaunin 2013 í flokki Fræðibóka og rita almenns efnis.