Sjötta alþjóðlega sumarskólanum í handritafræðum er lokið þetta árið. Yfir sextíu manns hurfu glaðir á braut eftir strangt nám og vikudvöl hérlendis. Skólinn er á vegum stofnunarinnar og Árnastofnunar í Kaupmannahöfn í góðu samstarfi við Landsbókasafn-Háskólabókasafn. Annað hvert ár fer námið fram í Kaupmannahöfn.

• Lesa um alþjóðlega sumarskólann í handritafræðum 2010 (á ensku)

Ásgeir Blöndal Magnússon, höfundur Íslenskrar orðsifjabókar (1989) og starfsmaður Orðabókar Háskólans um áratuga skeið, síðast sem forstöðumaður hennar, hefði orðið 100 ára 2. nóvember næstkomandi. Af því tilefni verður næsta málþing tímaritsins Orðs og tungu helgað minningu Ásgeirs. Það ber yfirskriftina Frá orði til orðs og verður haldið í fyrirlestrasal Þjóðarbókhlöðunnar laugardaginn 7. nóvember. Fyrirlesarar verða átta, þ.á m. tveir erlendir gestir – Arne Torp frá Osló og Bente Holmberg frá Kaupmannahöfn. Dagskrá þingsins verður auglýst nánar síðar.

Á vegum Stofnunar Árna Magnússonar í íslenskum fræðum hafa verið ofin mörg gagnasöfn sem nýtast mönnum í leik og starfi. Á Vísindavöku verða nokkur þeirra kynnt þar sem gestir geta leitað svara með aðstoð vísindamanna. Hver kannast ekki við óvissu um málnotkun, beygingu, merkingu og hver orti hvaða vísu? Er t.d. gott mál að segja; húsið opnar kl.

Þann 5. október hefst 8 vikna íslenskunámskeið á vegum Háskóla Íslands sem nefnist: Icelandic Online Plus. Icelandic Online Plus er vefnámskeið í íslensku sem er ætlað erlendum háskólanemum.

• Nánari upplýsingar á ensku

Örnefnasöfnun og örnefnaskráning eru hugðarefni manna um land allt. Svavar Sigmundsson stofustjóri Örnefnasafns Stofnunar Árna Magnússonar í íslenskum fræðum fer á næstunni um landið og verður á fræðslufundum um örnefni. Svavar hefur um langt árabil rannsakað örnefni og mun hann m.a. ræða um söfnun örnefna á svæðunum, mikilvægi þeirra og skráningu. Ókeypis verður inn á fundina og gefst nægur tími til að spyrja Svavar um hvað eina sem fólk vill vita um örnefnasöfnun og örnefnaskráningu.

Starf í Nordisk sprogkoordination hefur verið auglýst laust til umsóknar. Umsóknarfrestur rennur út á hádegi þann 25. september.

• Lesa auglýsinguna (á dönsku).

Að venju verða málstofur Stofnunar Árna Magnússonar í íslenskum fræðum haldnar mánaðarlega í vetur. Fram að jólum eru áætlaðar þrjár málstofur. Sú fyrsta verður föstudaginn 9. október (málstofunni hefur verið frestað) en síðan verða þær að jafnaði haldnar síðasta föstudag hvers mánaðar. Svavar Sigmundsson talar á málstofu í lok október og Guðrún Ingólfsdóttir heldur erindi á málstofu nóvembermánaðar.

Málstofur verða haldnar að Neshaga 16, í húsnæði orðfræðisviðs á efstu hæð, og hefjast kl. 15:00. Hver málstofa verður kynnt nánar á vefsíðu stofnunarinnar þegar nær dregur.

Félag um átjándu aldar fræði heldur málþing undir yfirskriftinni Fornleifarannsóknir síðustu ára og saga Íslands á sextándu, seytjándu og átjándu öld laugardaginn 31. október nk. í Þjóðarbókhlöðu, fyrirlestrasal á 2. hæð. Málþingið hefst kl. 13.00 og því lýkur um kl. 16.30.

Handritasafn Árna Magnússonar er í hópi 35 verka sem Menningarmálastofnun Sameinuðu þjóðanna, UNESCO, hefur sett á sérstaka varðveisluskrá sína. Tilgangur varðveislulistans er að vekja athygli á mikilvægi þess að varðveita andlegan menningararf veraldar með því að útnefna einstök söfn sem hafa sérstakt varðveislugildi.

Stofnun Árna Magnússonar í íslenskum fræðum auglýsir styrki Snorra Sturlusonar fyrir árið 2010 lausa til umsóknar. Styrkirnir eru veittir erlendum rithöfundum, þýðendum og fræðimönnum (ekki háskólastúdentum) á sviði mannvísinda til að dveljast á Íslandi í þrjá mánuði hið minnsta í því skyni að kynnast sem best íslenskri tungu, menningu og mannlífi. Styrkirnir miðast að öllu jöfnu við greiðslu á ferðakostnaði styrkþega til og frá Íslandi og dvalarkostnaði innanlands.

Ármann Jakobsson, dósent í íslenskum bókmenntum við Háskóla Íslands og fyrrverandi starfsmaður Árnastofnunar, tók við hvatningarverðlaunum Vísinda- og tækniráðs úr hendi Jóhönnu Sigurðardóttur forsætisráðherra á Rannsóknaþingi nú í morgun. Að þessu sinni bárust rúmlega 20 tilnefningar til verðlaunanna, en sérstök dómnefnd skipuð fyrri verðlaunahöfum velur verðlaunahafa úr hópi tilnefndra. Það var einróma niðurstaða dómnefndarinnar að veita Ármanni verðlaunin að þessu sinni.