Í örnefnasafni Stofnunar Árna Magnússonar í íslenskum fræðum eru geymdar skrár yfir örnefni á flestum jörðum á Íslandi. Elsta skráin er úr fórum Brynjúlfs Jónssonar frá Minna-Núpi og er dagsett 29. október 1910. Hana gerði nafni hans Bjarnason yfir jörðina Framnes á Skeiðum.

Örnefnaskrár í örnefnasafni skipta þúsundum. Undanfarin ár hefur verið unnið að því að skanna þær á pdf-form. Nú eru til tölvutækar skrár af stærstum hluta landsins. Hægt er að óska eftir því að fá örnefnaskrár sendar í tölvupósti með því að senda beiðni á netfangið nafn [hjá] arnastofnun.is. Örnefnaskrárnar eru flokkaðar eftir sýslum og hreppum og tekur safnið mið af þeirri skipan sem var við lýði kringum 1970, áður en sameiningar sveitarfélaga hófust af fullu afli. Hægt er að sjá yfirlit yfir sýslur og hreppa á þessari síðu. Enn fremur er hægt að leita að staðsetningu bæja í hrepp og sýslu með því að fara í Bæjatalið á heimasíðu Árnastofnunar.

Örnefnasafn er mikið notað af almenningi og fræðimönnum, bæði fólki sem byggir jarðir eða tengist þeim á annan hátt, sumarhúsafólki, ferðamönnum, sagnfræðingum, málfræðingum, landfræðingum, þjóðfræðingum og mörgum öðrum.