Traustar handbækur eru mikilvæg forsenda fyrir öflugri kennslu í íslenskri málfræði og gerð kennsluefnis fyrir grunn- og framhaldsskóla og jafnframt nauðsynleg hjálpartæki við frekari rannsóknir. Fyrir skömmu kom út hjá Almenna bókafélaginu ritið Íslensk tunga 1-3 en það er þriggja binda yfirlitsrit um íslenska málfræði. Ritstjórar og aðalhöfundar eru Kristján Árnason, Guðrún Kvaran og Höskuldur Þráinsson. Útkoma þessa rits markar nokkur tímamót og gefur tilefni til að meta ástand og horfur á sviði yfirlitsrita um íslenska málfræði og ræða hver næstu skref ættu að vera.

Málstofu Stofnunar Árna Magnússonar í íslenskum fræðum sem vera átti föstudaginn 23. nóvember hefur verið frestað vegna árekstra við aðra viðburði.

Gunnlaugur Ingólfsson mun flytja fyrirhugað erindi sitt ,,Tvær ritgjörðir eftir Sveinbjörn Egilsson" í málstofu föstudaginn 4. janúar 2008 kl. 15:00.

Minnt er á viðburði á vegum stofnunarinnar í desember:

Í tilefni af degi íslenskrar tungu, 16. nóvember, heimsækir menntamálaráðherra, Þorgerður Katrín Gunnarsdóttir, Stofnun Árna Magnússonar í íslenskum fræðum. Ráðherrann mun kynna sér starfsemi stofnunarinnar, ræða við stjórnendur og starfsfólk og opna formlega nýja vefsíðu Stofnunar Árna Magnússonar í íslenskum fræðum.

Frá árinu 1996 hefur 16. nóvember, sem er fæðingardagur Jónasar Hallgrímssonar, verið haldinn hátíðlegur og nefndur dagur íslenskrar tungu. Nánari upplýsingar um daginn og viðburði honum tengdum má fá á heimasíðu menntamálaráðuneytis: 

http://www.menntamalaraduneyti.is/malaflokkar/Menning/dit/

Verkefni starfsmanna stofnunarinnar eru eins ólík og þau eru mörg. Óhætt er að segja að sum vekja meiri áhuga og kátínu hjá þjóðinni en önnur.

Bókin 'Samræður við söguöld : frásagnarlist Íslendingasagna og fortíðarmynd' eftir Véstein Ólason hefur verið þýdd á ítölsku og nefnist: 'Dialoghi con l'era vichinga. Narrazione e rappresentazione nelle Íslendingasögur'. Þýðandi er Silvia Cosimini og útgefandi: Edizioni Parnaso, 2006.

Frumútgáfan var gefin út af Heimskringlu, háskólaforlagi Máls og menningar árið 1998. Sama ár kom út þýðing Andrew Wawn á ensku hjá sama forlagi.

Ríkisstyrkur Árnastofnunar í Kaupmannahöfn fyrir árið 2008 er laus til umsóknar. Umsóknarfrestur rennur út 19. nóvember. Styrkurinn er veittur íslenskum ríkisborgurum til handritarannsókna í Den Arnamagnæanske Samling í Kaupmannahöfn.

Um styrkinn geta sótt fræðimenn, með eða án háskólamenntunar. Styrkurinn er þetta árið um 20.700 danskar krónur á mánuði, auk ferðakostnaðar, og má veita umsækjanda í allt að tólf mánuði. Að jafnaði er styrkurinn aðeins veittur í 1-3 mánuði.

Vefur Stofnunar Árna Magnússonar í íslenskum fræðum hefur verið settur upp. Útlitið hannaði auglýsingastofan H2 hönnun. Umsjón og skipulagning vefs var í höndum vefstjórnar stofnunarinnar. Efni hefur verið komið fyrir í SoloWeb vefumsjónarkerfinu. Unnið er að því að setja vefinn upp á Norðurlandamáli og ensku. Nánari upplýsingar um vefinn má fá á heimasíðunni.

Styrkir Snorra Sturlusonar - 2008
Umsóknarfrestur til 31. október 2007

Helgina 12. og 13. október fer fram á Eiðum og Seyðisfirði Sigfúsarþing í minningu Sigfúsar Sigfússonar þjóðsagnaritara. Sigfúsarþingið er samstarfsverkefni Minjasafns Austurlands, Héraðsskjalasafns Austfirðinga, Gunnarsstofnunar, Árnastofnunar, Félags þjóðfræðinga á Íslandi og Miðstöðvar munnlegrar sögu. Lesa má meira um þingið á heimasíðu Miðstöðvar munnlegrar sögu.

Gripla XVII (2006), sem gefin er út af Stofnun Árna Magnússonar í íslenskum fræðum, er komin út og er þetta 67. ritið í ritröð stofnunarinnar Rit Árnastofnunar. Að vanda er efnið fjölbreytt en þar er að finna sex viðamiklar greinar og minningarorð um látna fræðimenn. Almennar upplýsingar um Griplu má lesa á útgáfusíðu stofnunarinnar.

Út er komið 9. hefti tímaritsins Orð og tunga sem áður var á vegum Orðabókar Háskólans en er nú gefið út af Stofnun Árna Magnússonar í íslenskum fræðum.