Líffærafræði leturs er sýning á verkum Sigríðar Rúnar Kristinsdóttur sem í sumar hlaut nemendaverðlaun frá Art Directors Club of Europe, fyrir bókina Líffærafræði Leturs. Fyrir sýninguna útfærði Sigríður Rún beinabyggingu fyrir alla stafi íslenska stafrófsins. Útfærslan er byggð á rannsóknum hennar á beinabyggingu dýra og manna. Hún notast aðallega við fuglabein, forneðlubein og fornfuglabein. Handskriftin er unnin upp úr einu elsta varðveitta handriti Íslendinga frá um 1250, Egils sögu Skallagrímssonar.

Alþjóðlega ráðstefnan ,,Heimur handritanna" verður haldin í Reykjavík 10.-12. október 2013. Ráðstefnan er öllum opin og ekki þarf að greiða fyrir þátttöku. Dagskrá og nánari upplýsingar eru á vef stofnunarinnar:

Steinunn Sigurðardóttir fatahönnuður opnaði örsýningu handrita á Þingeyrum í Húnavatnssýslu 31. maí. Við það tækifæri færði hún heimamönnum nákvæma eftirgerð Hersteins Brynjólfssonar að Flateyjarbók, skinnbók frá lokum 14. aldar. Guðrún Nordal forstöðumaður Stofnunar Árna Magnússonar í íslenskum fræðum kynnti handritið sem menn geta nú skoðað og fræðst um á sýningunni á Þingeyrum. Hönnuðir eru Finnur Arnar Arnarson myndlistarmaður og Sigrún Sigvaldadóttir grafískur hönnuður. Sýningin er styrkt af Menningarráði Norðurlands vestra.