Á sjötugsafmæli Einars G. Péturssonar 25. júlí 2011 gaf Stofnun Árna Magnússonar í íslenskum fræðum út rit honum til heiðurs. Það ber nafnið Hulin pláss og er úrval ritgerða sem Einar hefur samið á 35 ára ferli sínum við rannsóknir og útgáfur á stofnuninni. Ritið er 366 blaðsíður og skiptast ritgerðirnar í tvo flokka og hafa allar nema sú síðasta birst áður á prenti en eru nú yfirfarnar og auknar. Viðfangsefni í fyrri hluta eru bundin íslenskum fræðum og í síðari hluta er Einar á heimaslóðum í Dölum vestur.

Von er á heildarútgáfu Íslendingasagna á þýsku í haust og á dönsku, norsku og sænsku á næsta ári. 

Vakin er athygli á nýjum greinum í veftímaritinu Nefni sem Nafnfræðifélagið gefur út.

• Guðrún Kvaran, Nöfn og aftur nöfn
• Páll Sigurðsson - Aftökuörnefni

• Veftímaritið Nefnir

ÍSLEX veforðabókin í Noregi hefur hlotið rúmlega 50 milljóna króna styrk (2,5 milljónir norskra króna) frá menningar- og menntamálaráðuneyti Noregs til að vinna við orðabókina næstu tvö árin.

ÍSLEX veforðabókin er norrænt samstarfsverkefni, unnið af háskóla- og rannsóknarstofnunum á Norðurlöndum. Íslenski hlutinn er unninn á Stofnun Árna Magnússonar í íslenskum fræðum. Verkefnisstjóri er Halldóra Jónsdóttir og aðalritstjóri er Þórdís Úlfarsdóttir.

Alþingi hefur samþykkt lög sem tryggja lagalega stöðu íslenskrar tungu og íslensks táknmáls í íslensku samfélagi.

• Frumvarp til laga

Afmælisrit Jónínu Hafsteinsdóttur, Fjöruskeljar, er komið út.

Gabríela Friðriksdóttir myndlistamaður vinnur að sýningu sem verður opnuð í Schim Kunsthalle í Frankfurt í september. Sýningin er unnin í kringum skinnhandrit sem Gabríela valdi sjálf. Hún segir að valið eftir útlitinu hafi komið fræðimönnum á Stofnun Árna Magnússonar í íslenskum fræðum svolítið á óvart. Hún sér handritin fyrir sér sem einhvers konar hylki, sálnahlustur utan um reynslu og sögu fólks fyrr á tímum. Gabríela segir tilfinninguna þegar hún snerti handritin vera mjög sérstaka, hún fann orku streyma um sig.

Nöfn Íslendinga er jöfnum höndum fræðirit og uppflettirit um þau nöfn sem vitað er að Íslendingar hafi borið í aldanna rás og allt til nútímans. Verkið kom áður út árið 1991 en hefur nú verið rækilega endurskoðað auk þess sem um tvö þúsund nöfn hafa bæst við frá fyrri útgáfu. Alls er hér fjallað um sex þúsund nöfn Íslendinga.

Getið er um uppruna nafnanna og merkingu, aldur þeirra og tíðni, m.a. hversu algeng þau eru sem fyrra og seinna nafn, svo og sitthvað annað til fróðleiks og skemmtunar. Einnig er sýnd beyging allra nafnanna og mismunandi ritháttur.

Nordplus styrkir vefnámskeiðið Icelandic Online um 30.000 evrur eða tæpar fimm milljónir króna. Styrkurinn verður nýttur til að vinna Icelandic Online 5 og 6.

Icelandic Online er samfellt námskeið sem byggist á myndrænu og gagnvirku námsefni. Skráðir notendur eru um 70.000. Aðgangur er ókeypis.

Að verkefninu standa Hugvísindastofnun Háskóla Íslands, íslenskuskor hugvísindadeildar Háskólans, Stofnun Vigdísar Finnbogadóttur og Stofnun Árna Magnússonar í íslenskum fræðum.

• www.icelandiconline.is

Bæklingurinn Íslensk gjaldmiðlaheiti er nú aðgengilegur á heimasíðunni. Bæklingurinn var gefinn út árið 1997 og var fyrstur í röðinni Smárit Íslenskrar málnefndar. Í bæklingnum er skrá um íslensk heiti á gjaldmiðlum erlendra ríkja ásamt leiðbeiningum um stafsetningu á þeim tíma.

Baldur Jónsson tók saman í samráði við Anton Holt, Ólaf Ísleifsson og Veturliða Óskarsson.

http://arnastofnun.is/page/arnastofnun_mal_ritmalnefndarinnar

 Út er komið ritið Díslex, Dísæt lex(íkógraf)ía kennd Þórdísi Úlfarsdóttur fimmtugri 27. apríl 2011. Í ritinu eru 19 stuttar en bráðskemmtilegar greinar Þórdísi til heiðurs.

Útgefandi er Menningar- og minngarsjóður Mette Magnussen sem starfsmenn Stofnunar Árna Magnússonar í íslenskum fræðum hafa umsjón með og gefa út til gamans fjölrituð smárit til heiðurs samstarfsmönnum sínum og öðrum kollegum er þeir eiga merkisafmæli.

Umsjón með útgáfunni höfðu Halldóra Jónsdóttir, Jón Hilmar Jónsson og Guðrún Kvaran.