Veittar verða kr. 150.000 til að styrkja rithöfund til dvalar á Norðurlöndum. Umsóknir um styrkinn skulu berast Bókasafnssjóði höfunda, Dyngjuvegi 8, 104 Reykjavík. Síðasti skiladagur umsóknanna er 9. júlí 2010. Þeim skal fylgja greinargerð um hvernig umsækjandi hyggst verja styrknum. Nánari upplýsingar fást á skrifstofu Rithöfundasambandsins, netfang: rsi@rsi.is.

Mánudaginn 5. júlí 2010, hefst fjögurra vikna alþjóðlegt sumarnámskeið í íslensku í Háskóla Íslands. Námskeiðið er ætlað erlendum háskólastúdentum. Stofnun Árna Magnússonar í íslenskum fræðum gengst fyrir námskeiðinu í samvinnu við hugvísindasvið Háskóla Íslands og annast skipulagningu þess. Alþingi hefur veitt styrk til að unnt sé að halda námskeiðið. Þetta er í tuttugasta og fjórða skiptið sem slíkt námskeið er haldið.

Stofnun Árna Magnússonar í íslenskum fræðum auglýsir styrki Snorra Sturlusonar fyrir árið 2011 lausa til umsóknar. Styrkirnir eru veittir erlendum rithöfundum, þýðendum og fræðimönnum (ekki háskólastúdentum) á sviði hugvísinda til að dveljast á Íslandi í þrjá mánuði hið minnsta í því skyni að kynnast sem best íslenskri tungu, menningu og mannlífi. Styrkirnir miðast að öllu jöfnu við greiðslu á ferðakostnaði styrkþega til og frá Íslandi og dvalarkostnaði innanlands.

Vefurinn Handritin heima hefur verið þýddur á þýsku og verður opnaður formlega í Kíl í dag, 23. júní. Vefurinn var saminn af Laufeyju Guðnadóttur og Soffíu Guðnýju Guðmundsdóttur í samstarfi við Árnastofnun og Námsgagnastofnun.

Mánudaginn 7. júní, hófst fjögurra vikna norrænt sumarnámskeið í íslensku í Háskóla Íslands. Námskeiðið er ætlað háskólastúdentum í norrænum fræðum sem stunda nám á Norðurlöndum. Stofnun Árna Magnússonar í íslenskum fræðum gengst fyrir námskeiðinu í samvinnu við íslensku- og menningardeild Háskóla Íslands og annast skipulagningu þess. Norræna ráðherranefndin hefur veitt styrk til að unnt sé að halda námskeiðið.

Forseti Eistlands, Toomas Hendrik Ilves, og eiginkona hans, frú Evelin Ilves, voru í opinberri heimsókn á Íslandi 10. og 11. júní í boði forseta Íslands, Ólafs Ragnars Grímssonar. Forsetarnir heimsóttu Þjóðmenningarhúsið, þar sem Markús Örn Antonsson forstöðumaður tók á móti þeim. Gestirnir skoðuðu handritasýningu Stofnunar Árna Magnússonar í íslenskum fræðum í fylgd Guðrúnar Nordal forstöðumanns stofnunarinnar.

Mennta- og menningarmálaráðherra Færeyja, Helena Dam á Neystabø, kom 4. júní til Íslands í heimsókn. Ráðherrann þingaði í mennta- og menningarmálaráðuneytinu þar sem greinilega kom fram mikill samstarfsvilji Færeyinga í málefnum vísinda, skóla og menningar. Guðrún Nordal forstöðumaður Stofnunar Árna Magnússonar í íslenskum fræðum tók á móti ráðherranum laugardaginn 5. júní og kynnti honum starfsemi stofnunarinnar.

Handrit eru nú aftur til sýnis á handritasýningu stofnunarinnar í Þjóðmenningarhúsinu. Vegna viðgerða og endurbóta á handritaskáp og sýningarherbergi þurfti að fjarlægja þau tímabundið þótt sýningin hafi að öðru leyti verið opin gestum.

Handritin sem skoða má á sýningunni eru:

Íslex er orðabókarverk sem er unnið á vegum stofnunarinnar í samstarfi við stofnanir á Norðurlöndum. Orðabókin á að nýtast öllum sem þurfa á íslensk-norrænum orðabókum að halda og er ætluð til birtingar á vefnum. Þórdís Úlfarsdóttir og Halldóra Jónsdóttir stýra verkefninu hér á landi. Í Skímu málgagni móðurmálskennara sem kom út á dögunum má lesa um verkefnið í grein eftir Úlfar Bragason rannsóknarprófessor á stofnuninni sem ber heitið „Íslenska á alþjóðavettvangi“.

Íslensk stjórnvöld styðja nú kennslu í nútímaíslensku við fimmtán háskóla í Evrópulöndum, við Manitobaháskóla, Bejingháskóla erlendra tungumála og Wasedaháskóla í Tókýó. Árlegur fundur íslenskukennara, sem starfa við háskóla erlendis, verður haldinn við University College London og Cambridgeháskóla dagana 28. og 29. maí nk.

Alþjóðasvið Stofnunar Árna Magnússonar í íslenskum fræðum hefur umsjón með kennslu í íslensku við erlenda háskóla af hálfu íslenskra stjórnvalda og skipuleggur fundinn í samráði við íslenskukennarana.