Stofnun Árna Magnússonar í íslenskum fræðum kynnir glænýja útgáfu, Þorsteins sögu Víkingssonar, sem hér er í fyrsta sinn prentuð eftir handritinu AM 556 b 4to. Þórdís Edda Jóhannesdóttir bjó textann til útgáfu og ritar inngang.

Efni bókarinnar

Á miðöldum voru samdar og skrifaðar upp margar sögur um fornar hetjur frá Norðurlöndum á öldunum fyrir landnám Íslands. Þó að sögurnar séu fjölbreyttar að efni og byggingu er hefð fyrir því að vísa til þeirra í heild sem fornaldarsagna Norðurlanda.

Meðal þessara sagna er Þorsteins saga Víkingssonar. Hún gerist að mestu í Noregi eða á óljósum landsvæðum í nágrenninu og lýsir þremur kynslóðum karla, átökum þeirra á milli, bardögum og herleiðöngrum.

Sérstök áhersla er lögð á vinina Víking og Njörfa sem halda tryggð hvor við annan alla ævi en mikið reynir á vináttuna þegar synir þeirra, Þorsteinn og Jökull, verða svarnir fjendur. Sagan dregur þannig fram sígild stef mannlegs lífs en um leið er skemmtanagildi fólgið í ævintýrum, kynlegum uppákomum og kjarnyrtu máli.

Nánar um þessa útgáfu textans

Sagan var að öllum líkindum samin á 14. öld en elstu handrit hennar eru þó frá 15. öld. Í þessari útgáfu er texti sögunnar prentaður eftir handritinu AM 556 b 4to en ólíkir leshættir annarra miðaldahandrita prentaðir neðanmáls. Sögunni fylgir inngangur þar sem gerð er nánari grein fyrir varðveislu sögunnar, aldri og bókmenntasögulegu samhengi.

Nánar um höfundinn

Þórdís Edda Jóhannesdóttir er með doktorspróf í íslenskum bókmenntum frá Háskóla Íslands og er ritstjóri við Ordbog over det norrøne prosasprog í Kaupmannahöfn. Hún hefur skrifað greinar og kennt námskeið um íslenskar miðaldabókmenntir og handrit.