Föstudaginn 27. mars kl. 14:00 verður haldið málþing á Gljúfrasteini um Halldór Laxness og íslenskar fornbókmenntir.

Málhefjandi er Jóhann Páll Árnason. Til andsvara verða meðal annars Guðrún Nordal, Halldór Guðmundsson, Jón Karl Helgason, Vésteinn Ólason og Vilhjálmur Árnason. Einnig verða almennar umræður.

Aðgangur er öllum heimill og ókeypis inn.

• www.gljufrasteinn.is

Leszek Slupesci, prófessor í miðaldasögu í Rzeszow í Póllandi, nýtur Snorrastyrks Stofnunar Árna Magnússonar í íslenskum fræðum á haustmisseri 2009. Leszek hlaut styrkinn til að þýða Snorra-Eddu á pólsku, skrifa inngang að þýðingunni og skýringar við hana.

Leszek er nú að koma til landsins sem Erasmus-gistikennari í boði Ásdísar Egilsdóttur og Ármanns Jakobssonar hjá Íslensku- og menningadeild Háskóla Íslands. 

Eysteinn Þorvaldsson, íslenskufræðingur og fyrrverandi prófessor við Kennaraháskóla Íslands flytur erindi sem nefnist: Leitin að Völuspá þriðjudaginn 24. mars kl. 20.30. Fyrirlesturinn fer fram í bókhlöðusal Snorrastofu í Reykholti og er styrktur af Menningarráði Vesturlands. Aðgangseyrir er 500 kr. og er boðið upp á veitingar.

• Snorrastofa

Einar Á. E. Sæmundsen fræðslufulltrúi þjóðgarðsins á Þingvöllum heldur fyrirlestur á vegum Nafnfræðifélagsins laugardaginn 21. mars kl. 13.15 í stofu 130 í Öskju, húsi Háskóla Íslands. Einar mun fjalla um skráningu örnefna í þjóðgarðinum og hvaða aðferðafræði er beitt. Yfir 800 örnefni hafa verið skráð inn á loftmyndagrunn í landupplýsingakerfi þjóðgarðsins eftir mismunandi örnefnaskráningum. Í fyrirlestrinum ræðir Einar um aðferðafræðina, örnefnaskráningar og grunngögn sem liggja til grundvallar.

Fyrirlesturinn er öllum opinn.

Stjórn Nafnfræðifélagsins

Laus er til umsóknar tímabundin kennarastaða í íslensku í Vínarborg. Staðan verður veitt frá 1. september 2009.

Umsækjendur skulu hafa lokið M.A. prófi í norrænum fræðum. Æskilegt er að þeir hafi kennslureynslu, íslensku að móðurmáli og góða þýskukunnáttu.

Upplýsingar um kennsluskyldu og launakjör fást hjá Úlfari Bragasyni, rannsóknarprófessor, í síma 562 6050 eða á skrifstofu skorar norrænna mála við Vínarháskóla í síma (43) 1 4277-43051; netfang: ina.ritter [hjá] univie.ac.at

Alþingi samþykkti í gær þingsályktunartillögu menntamálaráðuneytis um að samþykkja tillögur Íslenskrar málnefndar um íslenska málstefnu. Hana má lesa á vef málnefndarinnar:

• Íslensk málnefnd

Íslensk málnefnd samdi tillöguna að undangenginni röð málþinga sem haldin voru á árinu 2008. Markmiðið með þeim var að efna til umræðu um mismunandi svið málstefnunnar og kalla fram sjónarmið hlutaðeigandi hópa:

Í viðtali við Guðrúnu Nordal, forstöðumann stofnunarinnar, í Víðsjá á Rás eitt í gær kom m.a. fram mikilvægi þess að hús yfir starfsemina rísi en upphaflega var áætlað að starfsemin sameinist í húsi íslenskra fræða árið 2011.

Starfsmenn nafnfræðisviðs stofnunarinnar hafa í samstarfi við Landmælingar Íslands og Loftmyndir ehf. unnið að þróun veflægrar kortasjár fyrir örnefni. Þessi nýja veflausn mun án efa hleypa miklum krafti í skráningu og staðsetningu örnefna í stafrænan gagnagrunn. Sjá frétt á heimasíðu Landmælinga.

Guðrún Nordal, prófessor, tók við starfi forstöðumanns Stofnunar Árna Magnússonar í íslenskum fræðum þann 1. mars sl. Menntamálaráðherra skipaði Guðrúnu í embættið til 5 ára að fenginni umsögn dómnefndar stofnunarinnar um prófessorshæfi umsækjenda og stjórnar stofnunarinnar.

Menningarverðlaun DV voru afhent í gær. Verðlaunin, sem voru veitt í átta flokkum - bókmenntum, byggingarlist, fræðum, hönnun, kvikmyndalist, leiklist, myndlist og tónlist -, eru fyrir framúrskarandi árangur á listasviðinu á síðastliðnu ári.

Menningarverðlaun DV verða afhent í þrítugasta sinn í Iðnó í kvöld, miðvikudaginn 4.mars. Verðlaunin, sem eru veitt í átta flokkum - bókmenntum, byggingarlist, fræðum, hönnun, kvikmyndalist, leiklist, myndlist og tónlist -, eru fyrir framúrskarandi árangur á listasviðinu á síðastliðnu ári.

Ársskýrsla Stofnunar Árna Magnússonar í íslenskum fræðum fyrir árið 2008 er komin út á rafrænu formi. Hún hefur að geyma yfirlit yfir starfsemi stofnunarinnar og rekstrarreikning. Skýrsluna má opna í pdf skjali hér á síðunni.

• Ársskýrsla 2008  ( 1.351 k)