Skip to main content

Rannsóknir og starfsemi

Rannsóknir
Á Stofnun Árna Magnússonar í íslenskum fræðum er unnið að hagnýtum og fræðilegum rannsóknum á íslensku máli, bókmenntum, sögu og menningu. Við stofnunina starfar fjöldi fastráðinna fræðimanna auk gesta sem hafa þar rannsóknaraðstöðu í lengri eða skemmri tíma. Að auki hafa nokkrir doktorsnemar og nýdoktorar rannsóknaraðstöðu á stofnuninni og vinna að verkefnum sínum í nánu samstarfi við starfsmenn og gestafræðimenn stofnunarinnar. Þá veitir stofnunin erlendum rithöfundum, þýðendum og fræðimönnum styrki Snorra Sturlusonar sem gera þeim kleift að dveljast um tíma á Íslandi við störf sín og loks stendur hún fyrir málþingum og ráðstefnum á fræðasviði stofnunarinnar.
Starfsemi
Handrit og þjóðfræði
Stofnun Árna Magnússonar í íslenskum fræðum er leiðandi í handritarannsóknum. Handrit í vörslu stofnunarinnar koma úr nokkrum söfnum.

Stofnunin geymir þjóðfræðisafn en í því er hljóðritað efni sem safnað er úr munnlegri geymd.
Mál og málnotkun
Við stofnunina eru stundaðar margvíslegar rannsóknir, sögulegar og samtímalegar, á íslensku máli, málnotkun og málstefnu. Margar þeirra snerta orðaforða og nöfn, einkum örnefni, og tengjast gjarna hagnýtri og fræðilegri orðabókafræði og málrækt.
Íslenska sem annað mál
Nemendur sem ekki hafa íslensku að móðurmáli hafa í gegnum árin haft margt að sækja til stofnunarinnar. Sumarnámskeið í íslensku eru haldin árlega auk þess sem nemendur geta sótt um margvíslega styrki til að hefja nám í íslensku með milligöngu stofnunarinnar.