Dönsk og íslensk stjórnvöld hafa gert með sér samkomulag um að fjármagna í sameiningu þriggja ára átaksverkefni sem miðar að því að efla rannsóknir á handritum í safni Árna Magnússonar og kynna þau.
Á tímabilinu 2026–2028 verður fjármunum varið til styrkja fyrir vísindafólk til rannsókna á handritum í handritasöfnunum í Kaupmannahöfn og Reykjavík, til tveggja alþjóðlegra ráðstefna sem haldnar verða í Reykjavík og Kaupmannahöfn, auk ýmissa sameiginlegra verkefna sem lúta að kynningu og stafrænni miðlun safnsins.
Í stýrihópi verkefnisins eru Lena Rohrbach formaður, Anne Overgaard Jørgensen, Hallgrímur J. Ámundason, Anne Mette Hansen og Guðrún Nordal.
Ráðstefna um skil á menningararfi
Fyrri ráðstefna verkefnisins fer fram í Eddu 1.–2. desember 2026 og fjallar um handritamálið í alþjóðlegu samhengi og með vísan í alþjóðlegar deilur um skil á menningararfi. Dagskráin verður kynnt í byrjun nóvember.
Seinni ráðstefnan fer fram í Kaupmannahöfn við lok átaksverkefnisins.
Styrkir til handritarannsókna 2026
Árlega verða veittir styrkir til vísindafólks til rannsókna á handritum í söfnunum tveimur. Í forgangi verða verkefni þeirra rannsakenda sem eru á fyrri stigum ferils síns.
Árið 2026 hlutu eftirfarandi rannsakendur styrk til rannsókna við Árnastofnun í Reykjavík:
- Adrián Israel Rodríguez Avila, Bretlandi
- Sabine Heidi Walther, Þýskalandi
- Maria Katarzyna Klejnowska, Póllandi
- Lea Debora Pokorny, Svíþjóð
- Madita Knöpfle, Sviss
- Hadrian Harms, Sviss
- Lionel Dominique Perabo, Frakklandi
- Oscar Agnello, Ítalíu
- Dr. Clare Mulley, Bretlandi
- Alessia Angelini, Ítalíu
- Alice Fardin, Ítalíu