Skip to main content

Fréttir

Nýr sýningarstjóri tekinn til starfa

Sigrún Kristjánsdóttir hóf í vikunni störf sem nýr sýningarstjóri Stofnunar Árna Magnússonar í íslenskum fræðum. Sigrún mun stýra mótun og uppsetningu nýrrar sýningar í Húsi íslenskunnar sem áætlað er að verði opnuð haustið 2023. Sýningin veitir tækifæri til að vekja áhuga á þeim menningararfi sem felst í fjölbreyttum gögnum Árnastofnunar og sýna hann í nýju ljósi.

Sigrún er með meistaragráðu í safnafræði frá Háskólanum í Leicester og BA-gráðu í þjóðfræði frá Háskóla Íslands. Síðastliðin ár hefur hún sinnt mörgum verkefnum í krafti starfs síns sem deildarstjóri miðlunar og fræðslu hjá Borgarsögusafni Reykjavíkur en meðal annars stýrði hún uppsetningu á grunnsýningu Sjóminjasafnsins, Fiskur og fólk: Sjósókn í 50 ár. Fyrir starfstíð sína hjá Borgarsögusafni gegndi hún starfi forstöðumanns Menningarmiðstöðvar Þingeyinga og þar áður var hún fagstjóri safnfræðslu hjá Þjóðminjasafni Íslands. Þá kom hún að opnun nýs Þjóðminjasafns árið 2004 og hafði umsjón með vöruhönnun, greinaskrifum og fræðslumálum.

Við bjóðum Sigrúnu velkomna til starfa.