Stjórn Rannsóknasjóðs hefur lokið við úthlutun styrkja til nýrra rannsóknarverkefna fyrir árið 2022, stærstu úthlutun sjóðsins frá upphafi. Alls bárust 355 gildar umsóknir í Rannsóknasjóð og voru 82 þeirra styrktar eða rúmlega 23% umsókna.

Á sviði hugvísinda og lista voru fjórir styrkir tengdir Árnastofnun. Beeke Stegmann hlaut styrk fyrir verkefni sem kallast „Hringrás pappírs: Framleiðsla, frumnotkun og endurnotkun sautjándu aldar pappírs á Íslandi.“ 

Steinþór Steingrímsson verkefnisstjóri hlaut styrk fyrir doktorsverkefni sitt við Háskólann í Reykjavík „Smíði skilvirkra þjálfunargagna fyrir vélþýðingar."

Nýdoktorsstyrk hlaut Yelena Sesselja Helgadóttir Yershova fyrir verkefni sitt „Tilbrigði, texti og aðferðafræði við gerð á marktæku úrvali þjóðkvæðatexta með áherslur á þulur síðari alda.“

Einn doktorsnemi tengdur Árnastofnun, Lea Debora Pokorny, hlaut styrk fyrir verkefni sitt „Bókagerð á Íslandi á seinni hluta 14. aldar. Efnisleg rannsókn á handritum og handritagerð í evrópsku samhengi". Leiðbeinandi verkefnisins er Beeke Stegmann.

Við óskum styrkhöfum okkar til hamingju.