Hugvísindaþing 2010 verður haldið dagana 5. og 6. mars n.k. Hugvísindaþing er árviss ráðstefna Hugvísindasviðs Háskóla Íslands þar sem fram er borið það helsta í fræðunum í stuttum fyrirlestrum og málstofum ætluðum fræðasamfélaginu jafnt sem almenningi. Áhugasamir geta tekið dagana frá. 

• Hugvísindaþingið í fyrra (2009)

Sænska ríkisstjórnin hefur ákveðið að styrkja Háskólann í Gautaborg um 500.000 sænskar krónur (8,7 milljónir ÍKR) vegna samningar íslensk-sænskrar orðabókar. Bókin er gerð i samvinnu við Stofnun Árna Magnússonar í íslenskum fræðum og er hluti af svokölluðu ISLEX orðabókaverki. Innan ISLEX er einnig verið að þýða íslensk orð yfir á norsku og dönsku en bókin á að nýtast öllum þeim sem þurfa á íslensk-norrænum orðabókum að halda. Sérstök áhersla er lögð á að sinna þörfum sænskra, norskra og danskra notenda, ekki síst þýðenda úr íslensku á skandinavísku málin.

Í tilefni af 750. ártíð Snorra Sturlusonar, 23. september 1991, ákvað ríkisstjórn Íslands að efna til styrkja sem kenndir yrðu við nafn hans. Samkvæmt reglum um styrkina, sem gefnar voru út 1992, skulu þeir árlega boðnir erlendum rithöfundum, þýðendum og fræðimönnum til að dveljast á Íslandi í því skyni að kynnast sem best íslenskri tungu, menningu og mannlífi. Styrkirnir skulu veittir í þrjá mánuði hið minnsta og miðast við greiðslu á ferðakostnaði styrkþega og dvalarkostnaði innanlands.

Á stofnuninni eru til sölu falleg gjafakort og póstkort með myndum úr handritum. Einnig eru fáanleg einstök veggspjöld sem hafa verið hönnuð, m.a. í tilefni af ráðstefnum á vegum stofnunarinnar.

Upplýsingar um kortin og veggspjöldin má fá á heimasíðunni. Þar má einnig skoða myndir af þeim.

www.arnastofnun.is/page/arnastofnun_utgafa_vorur

Háskólinn í Árósum stendur fyrir sumarnámskeiðum 2010. Þar á meðal námskeiðinu: ,,From Greenland to Hell. Worldly, Mythological and Visionary Travels in Old Norse Literature".  Umsóknarfrestur rennur út 1. apríl 2010.

• Nánari upplýsingar má fá á heimasíðu skólans.

Thomas Kempka er þýskur skiptinemi við Háskóla Íslands sem heldur úti vefsíðunni Digital Kunstrasen (www.digitalkunstrasen.net) sem gefur út og dreifir tónlist, ljóðlist og myndlist á Netinu. Thomas sat meðal annars í námskeiði um íslenska menningu og þar tók hann sér fyrir hendur að vinna verkefni með upptöku úr þjóðfræðisafni stofnunarinnar. Hann valdi ölvísuna, Krúsarlögur kveikir bögur, í upptöku frá 1957 og fékk sjö tónlistarmenn frá ýmsum löndum til að endurhljóðblanda upptökuna.

Út er komin bókin Tiodielis saga.  Tiodielis saga er ævintýri sem sver sig í ætt við riddarasögur og segir frá riddara sem hverfur úr konungshirð á skóga, fer úr klæðum sínum og tekur á sig dýrsham og etur skógardýr og hefur eftir þeirra náttúru. Kona hans og elskhugi hennar fela klæði riddarans sem þá festist í dýrshamnum og fjallar sagan síðan um hvernig hann nær aftur lífi með mannseðli.

Þjóðhátíðarsjóður hefur úthlutað styrkjum fyrir árið 2010. Sex verkefni á vegum Stofnunar Árna Magnússonar í íslenskum fræðum fengu styrk að þessu sinni:

Verðlaun Jónasar Hallgrímssonar á degi íslenskrar tungu 2009 voru afhent á hátíðardagskrá í Ketilhúsinu á Akureyri. Auk þess voru veittar tvær sérstakar viðurkenningar fyrir störf í þágu íslenskrar tungu.

Katrín Jakobsdóttir mennta- og menningarmálaráðherra veitti Þorsteini frá Hamri Verðlaun Jónasar Hallgrímssonar 2009.

Stofnun Árna Magnússonar í íslenskum fræðum hefur nú opnað aðgang að tölvutækum gögnum úr Beygingarlýsingu íslensks nútímamáls (BÍN).
Aðgangurinn er veittur með atbeina Já sem stutt hefur stofnunina með veglegum fjárstyrk í þessu skyni. Gögnin verða opin til ársloka 2012, að lágmarki.

Nefningar, afmælisrit til heiðurs Svavari Sigmundssyni á sjötugsafmæli hans 7. september síðastliðinn, er við það að koma út. Von er á bókinni úr prentsmiðju innan skamms og þá verður henni dreift til áskrifenda.

Ritið inniheldur 35 greinar eftir Svavar sjálfan sem fjalla einkum um nafnfræðileg efni en einnig málsögu, orðhlutafræði, orðsifjafræði o.fl. Ritið er ríflega 450 blaðsíður og því fylgir ítarleg nafnaskrá og ritaskrá Svavars.

Svolítil seinkun hefur orðið á útgáfunni og eru áskrifendur ritsins beðnir velvirðingar á því.

Ritstjórn