Íslensk málnefnd kynnti tillögur að íslenskri málstefnu á málræktarþingi á degi íslenskrar tungu í fyrra, Íslenska til alls. Tillögurnar voru settar fram í ellefu köflum og snerta mikilvægustu svið þjóðlífsins að mati nefndarinnar. 

Í tilefni dags íslenskrar tungu 2009 hefur Íslenska til alls verið gefin út að nýju, endurbætt. Hægt er að lesa og prenta út nýju útgáfuna á heimasíðu menntamálaráðuneytis.

Degi íslenskrar tungu verður fagnað í fjórtánda sinn 16. nóvember 2009. Fastlega má gera ráð fyrir að flestir skólar landsins og margar aðrar stofnanir og samtök fagni deginum með einhverju móti.

Á Stofnun Árna Magnússonar í Kaupmannahöfn verður haldið þing til minningar um Árna Magnússon á fæðingardegi hans, 13. nóvember. Haraldur Bernharðsson, sérfræðingur í rannsóknarstöðu Árna Magnússonar er þar meðal fyrirlesara.

• www.nfi.ku.dk/kalender/am-memorial09/

Út er komið ritið Wawnarstræti (alla leið til Íslands), lagt Andrew Wawn 65 ára. Ritið inniheldur stuttar og skemmtilegar greinar fræðimanna og félaga Andrew til heiðurs. Umsjón með útgáfunni höfðu Robert Cook, Terry Gunnell, Margrét Eggertsdóttir og Þórunn Sigurðardóttir. 

DEN ARNAMAGNÆANSKE KOMMISSION - KØBENHAVNS UNIVERSITET

• Styrkur til handritarannsókna í Kaupmannahöfn

Ríkisstyrkur Árnastofnunar í Kaupmannahöfn fyrir árið 2010 er laus til umsóknar. Styrkurinn er veittur íslenskum ríkisborgurum til handritarannsókna í Den Arnamagnæanske Samling í Kaupmannahöfn.

Byrjendanámskeiðið Icelandic Online I, sem er sjálfstýrt vefnámskeið í íslensku sem seinna máli, var formlega tekið í notkun föstudaginn 27. ágúst 2004. Síðar var bætt við framhaldsnámskeiðinu Icelandic Online II. Icelandic Online er samfellt námskeið sem byggist á myndrænu og gagnvirku námsefni. Hvert námskeið samsvarar 45 – 90 klukkustunda námi. Icelandic Online er öllum opið án endurgjalds.

Ragnhildur Helgadóttir hefur beðið um lausn frá störfum sem formaður stjórnar Stofnunar Árna Magnússonar í íslenskum fræðum. Menntamálaráðherra hefur skipað Láru Magnúsardóttur formann í hennar stað.

• Stjórn stofnunarinnar

Málstofur Stofnunar Árna Magnússonar í íslenskum fræðum á haustmisseri:

• 30. október: Svavar Sigmundsson
• 20. nóvember: Viðar Pálsson
• 4. desember: Guðrún Ingólfsdóttir

Efni hverrar málstofu verður kynnt nánar þegar nær dregur.

Fundaröðin um örnefni og örnefnasöfnun sem haldin var á haustdögum á vegum menningarráða á landsbyggðinni og fleiri í samvinnu við stofnunina gekk vel. Fundirnir hafa vonandi glætt áhuga manna á að vinna að því að varðveita örnefni og koma þeim á varanlegt form og gera þau aðgengileg sem flestum. Tæplega fjörutíu manns sóttu fjölmennasta fundinn.

Katrín Jakobsdóttir, mennta- og menningarmálaráðherra, heimsótti stofnunina í gær ásamt fylgdarliði. Ferðin hófst í Þingholtsstræti á alþjóðasviði, þá lá leiðin í Árnagarð þar sem starfsemi handritasviðs og þjóðfræðasviðs var kynnt og bókasafnið skoðað. Heimsókninni lauk svo í Neshaga en þar eru til húsa svið málræktar, nafnfræði og orðfræði. 

Aldarminning Ásgeirs Blöndals Magnússonar

Í tilefni af því að 2. nóvember nk. verða liðin eitt hundrað ár frá fæðingu Ásgeirs Blöndals Magnússonar orðabókarritstjóra kemur út bók með orðfræðiritgerðum og öðrum málfræðiritgerðum Ásgeirs. Hún nefnist Úr fórum orðabókarmanns og verður um 300 bls. að stærð. Bókin er seld á sérstöku áskriftarverði, 3000 kr., sem gildir til 1. nóv. nk.