Ákveðið hefur verið að ráða Emily Lethbridge í stöðu rannsóknarlektors á nafnfræðisviði Stofnunar Árna Magnússonar í íslenskum fræðum. Um starfið bárust fimm umsóknir.

Emily er með doktorspróf frá Cambridge-háskóla í íslenskum miðaldabókmenntum, textafræði og handritafræði. Í rannsóknum sínum leggur hún áherslu á nálganir sem snúa að landslagi, örnefnum og landsháttum, og samband miðaldatexta og landslags.

Gunnlaugur Ingólfsson, emeritus við Stofnun Árna Magnússonar í íslenskum fræðum, hefur búið til prentunar ritið
Fjölnisstafsetningin.  Hliðarspor í sögu íslenskrar stafsetningar.

Í bókinni er fjallað um helstu atriði þessara stafsetningarnýjunga og viðbrögð við þeim, svo og áhrif og afdrif þeirra. Bókin byggir að miklu leyti á ritsmíðum sem hafa ekki fyrr komið út á prenti heldur hafa legið í handriti og eru varðveittar í handritadeild Landsbókasafns - Háskólabókasafns.

Í Öskju, einu af húsum Háskóla Íslands, hafa um 60 manns sem starfa við orðabókagerð á Norðurlöndum sameinast á ráðstefnu.

Í dag voru haldnir fjölmargir áhugaverðir fyrirlestrar en í hópi fyrirlesara voru Ari Páll Kristinsson og Jóhannes Bjarni Sigtryggsson frá Stofnun Árna Magnússonar í íslenskum fræðum.

Nánari upplýsingar má nálgast á
heimasíðu ráðstefnunnar.

Ráðstefnunni lýkur föstudaginn 2. júní.

Þrír doktorsnemar við Háskóla Íslands, þau Katelin Marit Parsons, Ryan Eric Johnson og Ólafur Arnar Sveinsson, koma að verkefni sem ber yfirskriftina Í fótspor Árna Magnússonar og hefur verið í gangi síðan árið 2015. Auk þeirra hafa á liðnu ári bæst í rannsóknarhópinn tveir doktorsnemar við háskólann í Madison-Wisconsin; þau Colin Connors og Lauren Poyer. Markmið verkefnisins er að skrá þau handrit og bækur sem innflytjendur frá Íslandi tóku með sér yfir hafið.

Háskólalestin er á ferðinni á vorin og fer vítt og breitt um landið. Megintilgangur lestarinnar er að opna undraveröld vísindanna fyrir skólabörnum og heimamönnum á hverjum áfangastað og kynna um leið fjölbreytta rannsóknarstarfsemi við Háskóla Íslands.

Í kjörgripsrými Safnahússins verður sýndur í fyrsta sinn kjörgripur úr handritasafni Árna Magnússonar: Krossfestingarmynd á skinnblaði frá 14. öld.

Á myndinni er hinn krossfesti Kristur fyrir miðju. Fyrir ofan hann er letrað á latínu: Jesús frá Nasaret, konungur Gyðinga. Honum á hægri hönd stendur María guðsmóðir í rauðum kyrtli með bláan höfuðdúk en hinum megin er Jóhannes lærisveinn Krists.

Þriðjudaginn 2. maí kom í heimsókn, á starfsstöð Stofnunar Árna Magnússonar í íslenskum fræðum við Laugaveg, hópur kennara og stúdenta úr Quebec-háskóla í Montréal.

Þau kynntu sér íslenskt mál og málstefnu en flest eru þau frönskumælandi Kanadamenn.