Steinunn Sigurðardóttir fatahönnuður opnaði örsýningu handrita á Þingeyrum í Húnavatnssýslu 31. maí. Við það tækifæri færði hún heimamönnum nákvæma eftirgerð Hersteins Brynjólfssonar að Flateyjarbók, skinnbók frá lokum 14. aldar. Guðrún Nordal forstöðumaður Stofnunar Árna Magnússonar í íslenskum fræðum kynnti handritið sem menn geta nú skoðað og fræðst um á sýningunni á Þingeyrum. Hönnuðir eru Finnur Arnar Arnarson myndlistarmaður og Sigrún Sigvaldadóttir grafískur hönnuður. Sýningin er styrkt af Menningarráði Norðurlands vestra.

Þriðjudaginn 21. maí var norski hluti ISLEX-veforðabókarinnar opnaður við hátíðlega athöfn í Litteraturhuset í Bergen. Vigdís Finnbogadóttir fyrrverandi forseti opnaði orðabókina og Johan Myking ávarpaði samkomuna fyrir hönd Bergens háskóla.

Í tengslum við opnuna var haldið málþing um íslenskt mál og íslenskar bókmenntir í Noregi. Idar Stegane, Bergsveinn Birgisson, ISLEX- þýðendurnir Tone Myklebost og Astrid Kjetså héldu fyrirlestra ásamt Jóni Hilmar Jónssyni frá orðfræðisviði Stofnunar Árna Magnússonar í íslenskum fræðum. Var málþingið vel sótt.

Ragnar Stefánsson jarðskjálftafræðingur og Hugleikur Dagsson myndasöguhöfundur opnuðu örsýningu handrita í Menningarhúsinu Bergi á Dalvík 12. maí. Við opnunina lýstu þeir upplifun sinni við að fóstra handritið Physiologus, blöð úr skinnbók frá um 1200 og færðu heimamönnum nákvæma eftirgerð Hersteins Brynjólfssonar að handritinu. Svanhildur Óskarsdóttir handritafræðingur kynnti handritið sem menn geta nú skoðað og fræðst um á sýningunni á Dalvík. Hönnuðir eru Finnur Arnar Arnarson myndlistarmaður og Sigrún Sigvaldadóttir grafískur hönnuður. Sýningin er styrkt af Menningarráði Eyþings.