Helga er sviðsstjóri íslenskusviðs Árnastofnunar og sinnir því fjölbreyttum verkefnum sem tengjast íslensku í fortíð og nútíð, hérlendis sem erlendis. Meðal verkefna Helgu er að hafa umsjón með gömlu seðlasöfnum Orðabókar Háskólans og ýmsum talmálsgögnum sem safnað hefur verið saman á undanförnum áratugum.

Helga er ritstjóri Samtalsorðabókar sem er orðabók sem varpar ljósi á orð og orðasambönd sem einkum koma fyrir í talmáli. Undanfarin ár hefur hún beint sjónum að samtölum ungs fólks, m.a. notkun enskra orða í íslensku samhengi. Hún tekur þátt í norrænum og alþjóðlegum rannsóknarhópum sem fjalla um þessi mál og hefur m.a. stýrt norræna netverkinu PLIS frá 2020 (Pragmatic loans in Scandinavian languages).

Helga er fulltrúi Íslands í samstarfsnefnd málnefnda á Norðurlöndum. Hún er einnig ritstjóri LexicoNordica, tímariti norrænna orðabókafræðinga.