Í Öskju, einu af húsum Háskóla Íslands, hafa um 60 manns sem starfa við orðabókagerð á Norðurlöndum sameinast á ráðstefnu.

Í dag voru haldnir fjölmargir áhugaverðir fyrirlestrar en í hópi fyrirlesara voru Ari Páll Kristinsson og Jóhannes Bjarni Sigtryggsson frá Stofnun Árna Magnússonar í íslenskum fræðum.

Nánari upplýsingar má nálgast á
heimasíðu ráðstefnunnar.

Ráðstefnunni lýkur föstudaginn 2. júní.

Þrír doktorsnemar við Háskóla Íslands, þau Katelin Marit Parsons, Ryan Eric Johnson og Ólafur Arnar Sveinsson, koma að verkefni sem ber yfirskriftina Í fótspor Árna Magnússonar og hefur verið í gangi síðan árið 2015. Auk þeirra hafa á liðnu ári bæst í rannsóknarhópinn tveir doktorsnemar við háskólann í Madison-Wisconsin; þau Colin Connors og Lauren Poyer. Markmið verkefnisins er að skrá þau handrit og bækur sem innflytjendur frá Íslandi tóku með sér yfir hafið.

Háskólalestin er á ferðinni á vorin og fer vítt og breitt um landið. Megintilgangur lestarinnar er að opna undraveröld vísindanna fyrir skólabörnum og heimamönnum á hverjum áfangastað og kynna um leið fjölbreytta rannsóknarstarfsemi við Háskóla Íslands.

Í kjörgripsrými Safnahússins verður sýndur í fyrsta sinn kjörgripur úr handritasafni Árna Magnússonar: Krossfestingarmynd á skinnblaði frá 14. öld.

Á myndinni er hinn krossfesti Kristur fyrir miðju. Fyrir ofan hann er letrað á latínu: Jesús frá Nasaret, konungur Gyðinga. Honum á hægri hönd stendur María guðsmóðir í rauðum kyrtli með bláan höfuðdúk en hinum megin er Jóhannes lærisveinn Krists.

Þriðjudaginn 2. maí kom í heimsókn, á starfsstöð Stofnunar Árna Magnússonar í íslenskum fræðum við Laugaveg, hópur kennara og stúdenta úr Quebec-háskóla í Montréal.

Þau kynntu sér íslenskt mál og málstefnu en flest eru þau frönskumælandi Kanadamenn.

Guðlaugur Þór Þórðarson utanríkisráðherra heimsótti stofnunina í vikunni og tók Guðrún Nordal forstöðumaður á móti honum og aðstoðarmanni hans. Svanhildur Óskarsdóttir á handritasviði stofnunarinnar sýndi honum nokkur merk handrit. Utanríkisráðherrann sagðist ánægður með að hafa komist í návígi við þennan dýra arf. Guðlaugur Þór var í fylgdarliði forseta Íslands þegar hann fór í janúar í sína fyrstu opinberu heimsókn til Danmerkur og skoðaði þá forn handrit í Árnasafni í Kaupmannahöfn.

Rakel Pálsdóttir hefur tekið við starfi á skrifstofu stofnunarinnar þar sem hún annast símsvörun, móttöku gesta og almenn skrifstofustörf á stjórnsýslusviði.

Rakel lauk BA-námi frá félagsráðgjafardeild Háskóla Íslands árið 2014. Hún hefur síðan starfað sem þjónustustjóri á velferðarsviði Kópavogsbæjar og við viðburðastjórnun hjá CP Reykjavík.

Rakel er boðin velkomin í starfsmannahóp Stofnunar Árna Magnússonar í íslenskum fræðum.