Komdu og láttu spá fyrir þér í Eddu! Það eru takmörkuð spádómspláss og eru gestir því beðnir að mæta tímanlega og skrá sig við komu. Svo er kjörið að skoða handritasýninguna Heimur í orðum í leiðinni.

Um Völvuna og tarotspilin

Æsandi æsir munu æða um ganga Eddu þegar Úlfhildur Dagsdóttir, rithöfundur, bókmenntafræðingur og afkomandi ásatrúar, gerist óvænt völva og les í Tarotspil norrænna goðsagna eftir listakonuna Kristínu Rögnu Gunnarsdóttur.

Tarotspil Kristínar eru auðug uppspretta innsæis í víðfeðman heim ásatrúar og tarothefðarinnar. Tarotspilin eiga sér fjölskrúðuga sögu og segja sjálf sögur jafnt af mikilfenglegum goðmögnum sem og hversdagslegum atvikum.

Úlfhildur hefur lesið í tarotspil í áratugi en kemur nú út úr skápnum sem völva. Hún var ekki skírð Jörmun Gunnur eftir Jörmungandi og harmar það enn. Samt eru norrænu goðmögnin henni nákomin og hún fagnaði því ákaft þegar Kristín Ragna gaf út Tarotspil norrænna goðsagna.

Viðburður á Facebook

Háskólanemum frá Norðurlöndunum stendur til boða að sækja Nordkurs-námskeið í tungumálum og menningu sem jafngilda 10 ECTS-einingum á BA-stigi.

Umsóknarfrestur er til 1. mars.

Námskeiðin eru haldin ár hvert við mismunandi háskóla á Norðurlöndunum á tímabilinu maí til ágúst og standa yfir í þrjár til fjórar vikur í senn.

Háskólanemar sem stunda nám við íslenska háskóla geta sótt um þátttöku án endurgjalds en greiða aðeins ferðakostnað og uppihald sjálfir.

Upplýsingar um námskeiðin má nálgast á heimasíðu Nordkurs (á dönsku).

Nánari upplýsingar veitir fulltrúi Nordkurs á Íslandi, Branislav Bédi (branislav.bedi@arnastofnun.is). 
 

Lísabet Guðmundsdóttir fornleifafræðingur flytur fyrirlestur í tengslum við sýninguna Heimur í orðum.

Efni fyrirlestrarins

Grænland var numið af norrænu fólki á seinni hluta 10. aldar. Ályktanir um viðarskort á Grænlandi á miðöldum eru hluti af hugmyndum manna um óhagstæð náttúruskilyrði sem leiddu til endaloka norrænu byggðanna þar.

Þær hugmyndir byggja hins vegar ekki á rannsóknum á viðarnotkun, eingöngu ályktunum sem dregnar hafa verið út frá rituðum heimildum og nútímaaðstæðum. Það er hins vegar ljóst að þær trjátegundir sem vaxa á Grænlandi hafa ekki getað fullnægt timburþörfum norrænna manna í landinu og þeir hafa því þurft að leita annarra leiða til þess að bæta þann skort upp.

Til þess að meta uppruna viðarins voru viðarsöfn rannsökuð frá fimm norrænum býlum á Grænlandi með það að markmiði að komast að því hvaðan og hvernig Grænlendingar öfluðu viða, hversu háðir þeir voru innflutningi og hversu stórt hlutverk innlent timbur og rekaviður lék í lífi Grænlendinga? Enn fremur verður fjallað um viðargripasöfnin og hvað þau geta sagt okkur um grænlenskt samfélag og daglegt líf á miðöldum.

Viðburður á Facebook

Á viðburðinum verður flutt myndbandsverk og efnt til opinnar umræðu um 1000 ára sögu aðfluttra kvenna á Íslandi.

Viðburðurinn verður á ensku og íslensku.

Nánar um verkefnið

Aðstandendur verkefnisins eru Emily Lethbridge, rannsóknarlektor við Árnastofnun, og leikskáldið Sarah Woods en báðar eru þær breskar að uppruna.

Árið 2025 heimsóttu þær konur sem höfðu komið til Íslands sem hælisleitendur og tóku viðtal við þær. Upp úr þessum samtölum unnu þær verk þar sem sögur og orð kvennanna eiga í samræðu við sögur um landnámskonur, sér í lagi Melkorku í Laxdæla sögu og Helgu í Harðar sögu.

Markmið viðburðarins er að hefja frjóa umræðu um hvar við erum stödd og hvert við viljum stefna sem samfélag.

Verkefnið hefur hlotið styrk frá Borgarsjóði en það er einnig hluti af rannsóknarverkefni hjá Rannís sem nefnist Kvennaspor: Afhjúpun og ljómun kvenna í sagnalandslagi Íslands. Rauði krossinn á Íslandi er einn af samstarfsaðilum verkefnisins. Þórunn Sveinbjarnardóttir forseti Alþingis setur viðburðinn.

Gísli Sigurðsson, rannsóknarprófessor á Árnastofnun, flytur fyrirlestur í tengslum við sýninguna Heimur í orðum.

Nánari upplýsingar síðar.

Sif Ríkharðsdóttir, prófessor við Háskóla Íslands, flytur fyrirlestur í tengslum við sýninguna Heimur í orðum.

Nánari upplýsingar síðar.