Laugardaginn 22. nóvember stendur Nafnfræðifélagið í samstarfi við Árnastofnun fyrir viðburði í Eddu.

Dagskráin hefst kl. 14 í fyrirlestrasal á 1. hæð þar sem Emily Lethbridge, rannsóknardósent á menningarsviði, heldur stutta kynningu um handritasýninguna Heimur í orðum með sérstaka áherslu á nöfn og nafnfræði.

Eftir kynninguna geta gestir gengið um sýninguna en auk þess gefst einstakt tækifæri til að skoða önnur gögn um nafnfræði í fórum stofnunarinnar á handritalessal sem almennt eru ekki til sýnis.

Boðið verður upp á veitingar að sýningarrölti loknu. Frítt er inn fyrir félagsmenn en aðrir greiða 1200 krónur inn á sýninguna.

Allir velkomnir!

Svanhildur Óskarsdóttir flytur fyrirlestur í Eddu í tengslum við handritasýninguna.

Frá og með 10. nóvember verður sjaldséð gersemi á sýningunni Heimur í orðum. Það er agnarlítið handrit frá 15. öld sem Árni Magnússon fékk í Flatey á Breiðafirði og fór með til Kaupmannahafnar. Af ókunnum orsökum hvarf það úr safni hans, komst í eigu þýsks bókasafnara en var síðan selt á uppboði í Lundúnum árið 1870 og prýddi um hríð einkabókasafn jarlsins af Crawford í Haigh Hall í Lancashire. Í fyrirlestrinum verður fjallað um handritið, efni þess og sögu.

Viðburður á Facebook

Tvær ævintýralegar sögur sem nutu mikilla vinsælda á Íslandi á miðöldum birtast nú á prenti.

Í bókinni Meyjar og völd. Rímur og saga af Mábil sterku má finna þrjár gerðir Mábilar rímna, frá fimmtándu, sautjándu og átjándu öld og fræðilega umfjöllun um efni þeirra og þróunarsögu. Konungsdóttirin Mábil sterka frá Vallandi er öllum fremri í riddaralistum. Hún drýgir miklar hetjudáðir í bardögum og var ein af fræknustu hetjum íslenskra bókmennta í 500 ár. Valgerður Kr. Brynjólfsdóttir er höfundur fræðitextans og bjó til útgáfu þrjár gerðir Mábilar rímna og Söguna af Mábil sterku og Móbil systur hennar.

Í Þorsteins sögu Víkingssonar greinir frá ævintýrum aðalhetjanna sem ferðast víða, afla sér fjár og frægðar og sigrast á margvíslegum hindrunum sem á vegi þeirra verða. Sagan er varðveitt í fjórum skinnhandritum, þremur frá fimmtándu öld og einu frá sextándu öld. Þórdís Edda Jóhannesdóttir bjó textann til útgáfu og ritar inngang.

Bókakynningin fer fram á kaffihúsinu Ými í Eddu þriðjudaginn 25. nóvember kl. 16.30. Boðið verður upp á kaffi og með því. Allir velkomnir.

Viðburður á Facebook.

Samstarfsnefnd um kennslu í Norðurlandafræðum erlendis heldur sinn árlega fund í Kaupmannahöfn  26.−27. nóvember. Í framhaldi af fundinum verður farið yfir stöðu kennslu Norðurlandafræða við erlenda háskóla.

Nánari upplýsingar um Samstarfsnefndina er að finna á heimasíðu SNU.

Staðsetning: Fyrirlestrasalurinn í Eddu.

Juan Camilo Roman Estrada er ljóðskáld, faðir, kennari, sögumaður og fjallavinur.

Juan er fjölmenningarfulltrúi Háskóla Íslands og verkefnastjóri verkefnisins Sprettur sem styður innflytjendur til háskólanáms.

Juan mun deila með okkur reynslu sinni af því að tvinna saman nánd við íslenskuna og hvernig hann hefur verið að rækta vistkerfi tilheyrunar fyrir nemendur af erlendum uppruna.

Annars hugar er fyrirlestraröð fyrir alla sem tala íslensku, töluðu íslensku eða vilja tala íslensku. Fyrirlestraröðin er samstarfsverkefni námsgreinarinnar Íslenska sem annað mál, Árnastofnunar og Málvísindastofnunar.

Léttar veitingar og spjall á eftir.

Allir velkomnir!

English

Juan Camilo Roman Estrada is a poet, father, educator, storyteller and friend of mountains.

Juan is the intercultural officer of the University of Iceland and project manager of the program Sprettur that supports immigrants into higher education.

Juan will share with us his experience in knitting an intimacy with Icelandic and how he has been cultivating an ecology of belonging for students of foreign background. 

Viðburður á Facebook

Umsóknarfrestur um styrki Snorra Sturlusonar fyrir 2026 er til 1. desember 2025.

Styrkirnir eru ætlaðir erlendum rithöfundum, þýðendum og fræðimönnum til að dveljast á Íslandi í því skyni að kynnast sem best íslenskri tungu, menningu og mannlífi.

Sérstök nefnd veitir styrkina og verður tilkynnt um úthlutun hennar í desember.

Sjá nánar um styrkina.

Stofnun Árna Magnússonar í íslenskum fræðum annast umsýslu með styrkjum menningar-, nýsköpunar- og háskólaráðuneytis til erlendra stúdenta til að stunda íslenskunám við Háskóla Íslands.

Árlega eru veittir um það bil tólf styrkir til BA-náms í íslensku sem öðru máli. Nemendur verða að hafa lokið a.m.k. einu námsári á háskólastigi.

Umsóknarfrestur er til 1. desember. Sjá nánari upplýsingar um styrkinn og skráningarblað á ensku.